意大利蘑菇燴飯 | Mushroom risotto

大力推薦呢個好見得人嘅意大利蘑菇飯。有時間自己做菇味湯底，勁好味。想再高level啲，煮完後灑上truffle oil，加埋parsley，即刻去左高級餐廳 :D 

材料 Ingredients:

牛肝菌           50g
香菇湯           1L (可以用現成雞湯代替)
洋蔥               1個 切碎
蒜頭               2粒 切碎
蘑菇               250g 切片
意大利飯       300g (我用arborio)
白酒               175ml
法式酸奶油   25g
洋芫荽碎 
馬森芝士       隨意 (parmesan)

做法 Method:

1. 將牛肝菌放熱香菇湯內浸15-20分鐘。洋蔥, 蒜頭切碎, 蘑菇切片。
2. 燒熱橄欖油加後加入洋蔥和蒜，煮一會，再加入蘑菇，多煮2分鐘。煮乾後加入白酒，並不時攪拌。 煮至大部份液體蒸發後，
3. 將牛肝菌拿走然後將高湯分次拌入。每次加半杯左右，直到所有的液體被吸收。
4. 拌入法式酸奶油和鹽。上碟後灑上洋芫荽和帕馬森芝士。

西班牙海鮮飯 | Pris' Paella

為什麼要叫 Pris' Paella? 因為呢個菜式係本小姐嘅殺手諫。話說當年個啲前度男朋友(其實以加呢個都係)，食完就比我成功綁住左個胃，反唔到轉頭！...其實就冇咁誇張，不過我個個朋友都話好好食，算係我比較拿手嘅菜色咁姐。 
同risotto一樣啦，有時間就自己整個雞湯/魚湯底啦，好味好多咖。 

材料: 
雞湯            80ml 
藏紅花絲    1/4茶匙 (saffron) 
蒜頭            1粒 
洋蔥            1大個 
紅辣椒        1隻 
西班牙腸    80g (chorizo) 
煙肉            50g 
西班牙米    150g 
百里香葉    1茶匙 
紅椒粉        1湯匙 (paprika) 
白酒            50ml 
雞肉            100g 
藍貝            10隻 
罐頭番茄    100g 
青豆            50g 
三文魚        100g 
大蝦            10隻 
香菜            3湯匙 (parsley) 
檸檬



做法: 
1. 將藏紅花絲加入雞湯湯內煮滾備用 
2. 西班牙腸切薄片 煙肉切條 洋蔥 切粒 
3. 燒熱油炒香洋蔥，辣椒及蒜頭，然後加入西班牙腸及煙肉炒5-10分鐘。 
4. 加入西班牙米，百里香葉，紅椒粉炒至米身有光澤，然後倒入白酒煮滾後再分次加入預備好的雞湯。 
5. 加入雞肉，煮5-10分鐘。然後再加入番茄。 
6. 加入藍貝(開口向下)， 三文魚及青豆 慢火煮至收汁。 
7. 加入及大蝦，熄火蓋好鑊將蝦焗熟 
8. 灑上香葉，用檸檬裝飾, 即成

凉拌蒜香茄子 | Garlic Sesame Aubergine

我至愛冷盤之一，夏天最佳開胃菜，容易整又唔係太肥，你都快啲整下啦。 

材料 Ingredients:
茄子     1隻 
蒜頭     3粒 
麻油     0.5湯匙 
麻醬     1湯匙 
醬油     1湯匙 
醋         1茶匙
糖         1茶匙 
芝麻     適量 

做法： 
1.茄子去皮 切粗條 蒸約15分鐘 
2.將蒜頭去皮 磨成茸，然後燒熱麻油贊入，並加麻醬，醬油，醋，糖拌勻。
3.茄子排放碟上 淋上步驟2的調味醬 灑上芝麻 後冷藏 即成

紅菜頭意大利飯 | Beetroot risotto

紅菜頭呀紅菜頭， 你實在係太特別了。 美麗嘅顏色，earthy又甜甜地嘅味道，實在係冇其他食材可以取代你。通常出街食親都係雜菌／菇意大利飯（怪我孤陋寡聞），但我獨愛紅菜頭味道清新又唔漏。你真係要試下呀。 要煮好味嘅意大利飯， 就要用好嘅雞湯（Heston 雞湯食譜按此）話曬成個飯都係用呢個base做嘛。不過我通常都懶，將啲雞骨同蔬菜倒曬入個slow cooker到就算數。 除此之外, risotto 其實都幾容易煮， 自己整唔洗洗錢去高級餐廳食啦。 

材料 Ingredients: 
合桃             5-6粒 
京葱             1條 
牛油             1片 
蒜蓉             1茶匙 
意大利米     140g 
白酒             120ml 
雞湯             400ml 
紅菜頭         300g (已煮熟) 
法式酸奶油 100g (Creme Fraiche) 
芝士              隨意(Parmesan or Goat) 


做法 Method: 
1. 紅菜頭刨絲。京葱切段。合桃切碎，白鑊炒香備用。 
2. 用牛油爆香京葱及蒜頭。 加入豆蔻，用慢火將京葱煮至軟身。 
3. 加入意大利米，炒勻後倒進白酒煮滾，然後轉中慢火分次加入雞湯。每次加一大杓 快乾水時又再加，並且不時攪動。 
4. 煮大約20-25分鐘，煮好前5分鐘加入紅菜頭絲拌勻。(煮至米身外軟內硬就對了) 
5. 熄火，並加入法式酸奶油拌勻。上碟後灑上芝士及合桃。

山寨版石頭飯 | Bibimbap

今日心血來潮 學人整韓國菜。當然啦 首先會試做楊先生最愛的石頭飯，等佢放工後驚喜下嘛! 如果食譜唔正宗切勿見怪，我覺得食落同人地餐廳個啲味都冇咩差別姐。另外就係，我加左金針落去 (-_-')，我知好奇怪但我覺得好好味...食譜冇寫到金針，但如果你好似我咁'勇於嘗試'，都可以加咖，做法同冬菇一樣. 
仲有呀 我冇個石頭 所以就用富有中國色彩嘅砂煲serve啦，哈哈... 
(食譜來源：幾年前一位韓國朋友 兼網上參考。已經忘記邊到...sorry!)

材料 Ingredients：

A. 
牛肉 100g 
糖 1茶匙 
醬油 0.5湯匙 
蒜蓉 2茶匙 
薑蓉 1茶匙 
麻油 1茶匙 

B. 
芽菜 50g 
鹽 適量 
麻油 1茶匙 
蒜蓉 0.5茶匙 

C. 
菠菜 50g
醬油 1茶匙 
麻油 1茶匙 
蒜蓉 0.5
茶匙 

冬菇 3隻 
醬油 0.5湯匙 
味醂 0.5湯匙 
糖 0.5茶匙 

蘿蔔 70g (切絲) 
麻油 1茶匙 
鹽 適量 
麻油 適量 
白飯 2碗 (已煮) 
蛋 1隻 
芝麻 適量

D. 
韓式辣醬 2湯匙 
豉油 0.5湯匙 
水 適量 
麻油 1茶匙 


做法 Method:

1. 牛肉切薄片後 用A料醃好備用。 
2. 芽菜用滾水燙10分鐘左右後過冰水 再與B料拌勻 備用 
3. 菠菜用滾水燙30秒左右後 過冰水 然後搾乾水 後與C料拌勻 備用 
4. 冬菇用清水浸軟身後去蒂切條，後用小許油炒香，再加入醬油，味醂及糖，煮至收汁備用
5. 用小許油炒香蘿蔔絲 再加入麻油及鹽備用 
6. 砂煲中抹上麻油，然後燒熱，再放入飯，飯面排好步驟1至5做好的材料，並加上一隻煎好的雞蛋 
7. 將D料拌勻，隨個人喜好放入適合份量 拌勻即成

蟹籽.青瓜沙律 | Crab roe and cucumber salad

哩個根本都唔洗食譜啦，切好啲野撈下就食得，不過都分享下啦。 夏天食好清涼咖 

材料 Ingredients：

青瓜          0.5條 
蟹柳          4條 
沙律醬      適量 (丘比)
蟹籽          1湯匙 


做法 Method: 

1. 青瓜去核，切絲，楂乾水備用。 
2. 蟹柳用叉弄散。
3. 蟹柳, 青瓜, 蟹籽和沙律醬拌勻 即成。（亦可以如相片中做法疊好） 

- 1000 Page View -

原本真係冇諗過會有人睇我個blog... 以加寫寫下，又有1000個page view！可能1000對人地黎講唔算係啲咩 但對我黎講真係好開心啦 :) 另外要講句唔好意思。 呢排好忙，下星期又去墨西哥旅行，冇咩時間寫blog... 等我呀，我好快會寫新食譜咖啦!

慶祝1000 page view - 懶得煮，出去食。

煙三文魚沙律.蜜糖芥辣汁 | Smoked salmon salad. honey mustard dressing

睇下自己個blog先發覺原來我好鍾意食煙三文魚。好似全部野都有啲魚先開心。 今日個沙律又係用煙三文魚。方便嘛，煎都唔洗煎下。*相中背景的靚女就是我的愛犬baby Belle

汁料:
洋蔥      0.5小個
蒜頭      1小粒
蜜糖      0.5湯匙
芥辣      0.5湯匙
米醋      1湯匙
橄欖油  2湯匙

材料:
煙三文魚
沙律菜
黑橄欖


做法：
將所有汁料打至完全混合，拌入沙律中即成。

煙三文魚.蛋包裹 | Smoked salmon & egg parcel

好朋友話要我整個 '超簡單，用料係啲common嘢，唔使用焗爐或其他特別道具，但睇落又好pro嘅食譜'。其實我大把呢啲啦！今日整呢個真係炒隻蛋，用啲煙三文魚包住就得啦 都見得人咖。買啲魚子放係面即刻高級埋添。仲有，係一定唔會難食。

   

材料 Ingredients: 
蛋               2隻 
牛奶           5湯匙 (全脂） 
蔥仔           適量 
牛油           1大片 
煙三文魚   4片 
魚子          適量 


做法 Method: 
1. 先打蛋，加小許鹽及全脂奶打勻 
2. 慢火溶化牛油 加入蛋液 等20秒後開始推蛋 （摺，不是炒，才會滑) 
3. 蛋快熟時再加入小許牛油，拌勻至溶化 備用 
4. 平放兩塊保鮮紙，上面分別放上兩片煙三文魚， 然後將蛋平均分兩份放三文魚上。之後包起保鮮紙成球狀壓實。 
5. 解開保鮮紙，包裹開口處向下 放碟上，再加魚子即成

煙肉蛋.荷蘭醬 | Eggs benedict

楊先生前排話好耐冇食過eggs benedict，咁我見放復活節假，當然要食個breakfast in bed啦。我好識做咁整定一份靚靚早餐仲有香滑咖啡 等佢起身食 係咪抵錫先。當然啦，我整比佢食自己就冇份，因為呢個早餐真係卡路里爆曬標… 
呢個菜式有三個元素： 
1.個隻蛋要做到半生熟，蛋黃半液體狀但又唔可以一切開流到周圍都係。 
2.煙肉要脆扑扑。 
3.汁要又濃又滑，只要唔好心急慢慢整就得咖啦。
另外唔用煙肉可以用煙三文魚都得 (eggs royale)。唔食肉就用波菜 (eggs florentine)，一樣好味。(注意我將相嘅賣相唔係好得，因為屋企無 muffin所以用麵包代替，另外我好像是加得太多汁了… -_-)

材料 Ingredients： 
龍蒿/白酒醋 1茶匙 
牛油 120g 
蛋黃 2個 
檸檬汁 適量 
煙肉 4片 
蛋 2隻 
醋 適量 
英式鬆餅 1個（橫切開1半） 

做法 Method： 
1. 如果用龍蒿醋，用刀背拍打龍蒿後放入醋內醃3-4星期。 
2. 先預熱烤架。另外用一個小鍋將牛油慢火煮溶，然後將面層雜質舀走。（牛油要保持熱但不用煮滾） 
3. 用一個可以坐於鍋上的器皿（鐵或玻璃碗）加入蛋黃，醋，少許鹽及1匙水後 隔水加熱並不停迅速攪拌至蛋黃變淺黃色及濃稠。 
4. 分次倒入熱牛油(分超多次，慢)，繼續不停攪拌直至完全混合及變濃。如果太濃可以加入檸檬汁稀釋。汁做好後備用 
5. 煙肉放烤架上燒香。此時 用另一鍋水煮滾後轉小火並加入鹽給小許醋。之後攪動滾水形成漩渦 後將蛋小心滑入。熄火後等3-4分鐘後將雞蛋撈起。 
6. 鬆餅烤熱 塗上牛油 放碟上。之後放煙肉，再放蛋，淋醬汁後灑上小許龍蒿，紅椒粉 即成。

低脂魚批.Hulk版 | Hulk Fish Pie

整出黎綠色，大大隻成隻 Hulk咁，仲唔係 Hulk pie?
食譜參考Jamie Oliver 某某電視節目 係教人點樣慳錢整晚飯嘅節目 (我唔係好同意fish會係慳錢嘅選擇)... 另外佢就用冰左嘅魚柳，我覺得魚新鮮好食，所以自己轉左。佢嘅fish pie加左唔小蔬菜，同傳統fish pie比係健康好多，值得一試。 

材料 Ingredients: 
青豆 200g 
薯仔 500g 
檸檬皮 1個 
奶油 2湯匙 
牛奶 適量 

洋蔥 1個 
蘿蔔 1個 
麵粉 2湯匙 
牛奶 160ml 
三文魚 100g 
白魚柳 180g 
蝦 60g 
檸檬汁 0.5個 


做法 Method:
1. 青豆拖滾水，入攪拌機打爛。魚 切塊。備用。 
2. 煮滾水後加入適量鹽，放入薯仔煮至完全軟身後撈起，放入檸檬皮屑，奶油及牛奶 壓成薯蓉。 
3. 洋蔥及蘿蔔切粒後落鑊炒香 約5-10分鐘。然後一邊攪拌一變加入麵粉，成糊狀後再慢慢分次加入牛奶。 
4. 當稀釋到適當程度時可加入已切塊的魚。最後熄火後才加入蝦及檸檬汁。
5. 將步驟4 的魚和白汁放焗盤內， 上層放薯蓉，再拌入青豆入焗爐焗半小時左右即成。 


貼示 Tips：
1. 放入青豆時可以和薯蓉拌成花紋哩。
2. 薯蓉可以整一些'小山丘' 焗好後凸起的地方會脆脆地。多一點口感嘛。

三文魚薯仔凍湯 | Vichyssoise

記得第一次飲凍湯覺得好奇怪 湯應該要熱辣辣，'雪雪聲'甘飲先好味嘛! 所以之後一直都冇再試。 後來有次去西班牙，當日行左成日又好熱就搵間餐廳食個午餐。頭盤係一個凍番茄湯。 唉，諗住算啦試下啦 - 點知... 出乎意料之外 我竟然覺得好正！ 酸酸甜甜又涼快， 我5分鐘內碗都lam乾淨埋。 今次跟cookery school食譜整呢個vichyssoise 又給我另一驚喜哩...
注意：我個湯嘅埋相麻麻地因為我冇餅模粒到整整齊齊咁。請見諒。

材料 Ingredients： 
牛油             50g 
京蔥             2條 
薯仔             150g 
香草             1紮 (bouquet garni)
法食酸奶油 1湯匙  (creme fraiche)
鹽，黑椒     適量 

三文魚        200g 
紅蔥頭        1個 
青瓜            1/4條 
白酒醋        20ml 
細沙糖        1/2茶匙 
蔥仔           裝飾用 

做法 Method： 
1. 薯仔去皮切幼條 
2. 慢火煮溶牛油，加入京蔥中火煮至軟身 
3. 加入薯仔條及500ml水及香料，煮沸後多煮10分鐘至軟身後待涼 
4. 將薯仔倒入攪拌機打爛至半液體狀。再加入酸奶油，鹽，黑椒，拌勻。 
5. 將步驟4混合物篩好（用木匙大力壓過去）之後放入雪櫃雪凍。 
6. 三文魚，紅蔥頭切碎。另外青瓜切碎後加入醋及糖拌勻。 
7. 將1/4份香蔥三文魚輕壓入圓形餅模底部，再壓入1/4份青瓜，及少許蔥仔。 
8. 取出薯仔湯倒於餅模外面後取走餅模 即成。

貼士：
自己整香草紮：parsley, bay leaf, thyme 每樣1-2條就可以，要連埋個柄 唔好只係落葉呀

墨西哥炒薯仔 | Tex Mex stir fry

我好鍾意整呢個菜式，一碟過好方便，仲要色彩繽紛咁見到都開胃啲。 鐘意食辣的話可以加少少 chipotle paste 落去，好惹味㗎！另外smoke powder比較難搵，可以唔落。

材料 Ingredients：
孜然              　1/2茶匙 （cumin) 
蒜頭              　1粒
洋蔥　              1/2個
西班牙臘腸      50g (chorizo) 
薯仔　              1個
紅椒　              1隻
紅椒粉              1湯匙 (paprika)
煙粉                  1茶匙 (hickory smoke powder)
奧勒岡              1茶匙 (oregano)
墨西哥辣椒      幾粒 (jalapeno) 


做法 Method： 
1. 孜然白鑊炒香備用。蒜頭切碎，洋蔥切絲，薯仔 紅椒切條。
2. 蒜頭及洋蔥落鑊略炒後加入西班牙臘腸。（注意臘腸有不少脂肪流出，不用下太多油） 
3. 之後加入薯仔，再加紅椒，紅椒粉，炒過的孜然，煙粉及奧勒岡。炒香後加入少許水，加蓋轉慢火煮至軟身。 
4. 上碟後灑上墨西哥辣椒及少許紅椒粉裝飾。

焗爐清洗日

星期日。講起來都有啲唔好意思，你可能覺得我嬌生慣養啦，但我真係咁大個女都冇洗過焗爐。今日放假 洗完衫，望下個焗爐，真係不堪入目，決定捲起個衫袖為我家的焗爐進行大清洗。

根據枝oven cleaner嘅指示，過程好簡單 - 噴係個爐裡面等30分鐘就可以抹走。我墊好曬報紙，再配上Stevie Wonder嘅 My Cherie Amour，憋住氣係咁噴。之後等左30分鐘...

咩叫做'no scrub formula'?! 絕對係勁scrub!! 我擦左起碼半個鐘，擦到腰骨痛。一路擦一路見到啲啡黑色嘅水，係咁洗反乾淨個海棉又再擦。漸漸水變成淺啡，再變成透明，真係好有成功感! 然後我又噴多次，30 mins後再擦。

你知道嗎 一切都係值得咖!  當你擦到乾淨曬後，你記起你個焗爐個門其實係玻璃做，係透明嘅時候，你會覺得幾辛苦都係值得咖！ 我以加可以見到焗爐裡面嘅野煮成點，太好啦...

2小時後，我沖好咖啡，翹埋手欣賞我閃令令嘅廚房。Best Sunday Ever!

香蔥吞拿魚煎餅 | Tuna Pattie. Wasabi Mayo

食譜來至 'Cookery School'（簡化後）。 容易整又好味。 去片~ 
*注意用新鮮吞拿魚，不是罐頭! 

材料 Ingredients:
吞拿魚         300g
蔥                 2條
薑                 1塊 （1cm 大小）
鹽                 適量

沙律醬        2湯匙（自家制食譜按此）
日式芥末    2茶匙 

做法 Method：
1. 吞拿魚切粒。蔥，薑切碎。加入鹽拌勻。
2. 將步驟1材料壓入曲奇餅模，成形後拿走餅模 備用
3. 將芥末拌入沙律醬
4. 大火煎香吞拿魚餅 （每面煎大約30秒，半生熟就可以）

豬柳杏桃酥皮卷. 黑布丁汁 | Pork & Apricot Roll. Black Pudding Sauce

我諗左個名好耐㗎啦，9唔搭8咁，又有豬肉 又有杏桃／杏子 又有西梅 又有酥皮。 仲有black pudding 中文好似係血腸 但咁樣唔係幾好聽嘛。總之...讀來讀去都好似好怪咁。不過呢個係我鐘意整比一大班人食嘅食譜。一來大大舊好飽肚，二來可以一早準備好 食前半個鐘先放入焗爐，三來係整出黎個樣都幾pro,可以呃得下人咁樣。Dinner party必備啊。啊，仲有-食完大堆生果乾，你第二日一定好暢順... 

材料 Ingredients: 
杏桃 100g 
西梅 100g 
紅蔥頭 2粒 
蒜頭 1粒 
酥皮 320g (我用ready rolled） 
巴馬火腿 6片 
豬柳 400g 
蛋槳 適量

雞湯 800ml 
洋蔥 1個 
白蘭地 100ml 
麵粉 1大匙 
芥辣 2茶匙 
黑布丁 1片 


















做法 Method: 
1. 焗顱預熱190度。將杏桃，西梅，紅蔥頭及蒜頭切碎，落鑊炒香 
2. 將步驟2材料煮至軟身後放入攪拌機打爛，備用 
3. 將酥皮打開，抹上步驟3材料，然後再放巴馬火腿 
4. 將豬肉放面並將酥皮捲起。 用手指將頭尾封好 
5. (於酥皮面上畫花紋)塗上蛋槳。焗分鐘後整置10分鐘即成。 

6. 雞湯煮滾，蒸發至剩下一半份量。 
7. 用另一個鍋下一大片牛油炒香洋蔥，再加入白蘭地。用長火柴燃起白蘭地。燒完後加入麵粉攪勻。 
8. 雞湯慢慢倒入洋蔥鍋內，然後再煮5分鐘左右。後隔走洋蔥並加入芥辣。 
9. 黑布丁握碎後加入雞湯內即成

蒜蓉沙律醬 | Aioli

雖然食完個口好大陣味，但係絕對值得。自己整沙律醬其實好容易，我食過後以後都唔想買超級市場個啲添。仲有呢個沙律醬可以做base你唔鍾意用蒜頭可以整其他味，例如wasabi啦，basil啦，果仁啦... 試試下都幾好玩㗎。我通常會點薯條食，或夾入fajita，或放係paella，或整漢堡包等等...好百搭 不能盡錄!

材料 Ingredients: 
蛋黃          1隻 
芥末          1茶匙 
鹽              0.5茶匙 
橄欖油      200ml 
蒜頭          1小粒 
檸檬汁      適量 

做法 Method: 
1. 蛋，芥末及鹽打勻後慢慢加入油，一邊加一邊不停攪動。 留意油及蛋黃要完全混合，愈慢愈容易控制。油加入一半後 可以加快倒油速度。
2. 蒜頭磨爛後加入沙律醬內。然後再加入檸檬汁 

貼士 Tips: 
強烈推薦用攪拌機整，就唔洗攪到手都軟。我用的是mini chopper，小量食物都可以攪到。如過用大部個啲就要整多啲份量啦。

小羊排.橄欖醬 ｜ Lamb Chop w/ Tapenade

聽聞 Tapenade係普羅旺斯（Provencale)嘅菜式，好鹹但又幾好味喎，用黎搽麵包/送酒一流。我鐘意加蒜頭落去，不過食完個口就... Heston推薦放tapenade係羊扒上面，我就試下整，結果真係唔錯。Anchovies嘅鹹香味蓋過羊嘅騷味，而且tapenade可以一早整定，煎塊羊扒就食得啦。我今次用左厚切小羊排，肉汁多及比較嫩滑。 

材料 Ingredients: 
黑橄欖          100g (用kalamata olive 自己去核） 
酸豆              2湯匙 （capers） 
油浸鯷魚     3條 （anchovies) 
蒜頭              1粒 
百里香          2茶匙 
檸檬汁          適量 
橄欖油          2湯匙 
 小羊排         4塊 

 做法 Method： 
1. 除羊排外，將所有材料打爛。可以用槌磨或用攪拌機，但注意勿攪太爛會失去口感。 
2. 煎羊排 每面大約2分鐘 (時間根據不同厚度加長減短)。煎後上碟靜置5分鐘左右。 
3. 將橄欖醬搽羊排面即成。

香煎魚柳配蘑菇波菜汁 | Pan fried fillet of fish w/ mushroom and spinach sauce

算係一個幾容易整嘅食譜 用黎做頭盤都幾好睇㗎。煮汁，煎條魚就食得，半個鐘都唔洗！

材料 Ingredients: 

牛油              1片
紅蔥頭          3個
蒜頭              2粒
蘑菇              150g
魚柳              4塊
白酒              30ml
魚湯              40ml
波菜葉          200g
刁草              1湯匙
法式酸奶油  3湯匙 （Creme fraiche)


做法 Method: 

1. 用少許海鹽及橄欖油醃魚柳。 紅蔥頭及蒜頭切碎。蘑菇切片
2. 下牛油熔化後放入蔥，蒜爆香及炒至軟身。之後加入蘑菇再炒。
3. 止時用另一個平底鑊落油煎香魚柳。 注意魚皮向下。
4. 贊白酒於步驟2， 蒸發後加入雞湯煮至收汁
5. 加入波菜，刁草， 軟化後熄火 並加入酸奶油拌勻。
6. 上碟時先放波菜汁， 上面再放魚柳。

貼士：

煎魚要皮脆肉滑， 首先皮唔好濕淋淋，魚要乾身。
鑊（最好係厚底鑊) 整個表面都要有一浸油，油夠熱先放魚落去。 煎時用鑊鏟禁下條魚，等佢個皮冇甘容易孿起。
煎魚時唔好郁來郁去， 煎好一面先反一次。反後魚已經7成熟，煎多陣就OK㗎啦。

摩洛哥南瓜羊肉煲 | Lamb and Squash Tagine

Tagine係摩洛哥名菜，甘我又唔係摩洛哥人，又無去過摩洛哥， 又無個個tagine器皿, 個食譜可能不太正宗。 不過我覺得好味, 理得佢正唔正宗哩? 就好似我家鄉香港嘅豉油西餐甘，我一樣食都lam曬脷。我有時會用slow cooker (慢燉鍋? 電鍋?), 返工前將肉炒香，然後放曬所有材入去煮到放工就食得。不過用slow cooker的話就要用小啲水啦。

另外，人地食tagine 就配cous cous, 我中國人就食飯... 唔好意思  -_-

 

材料 Ingredients：

醃漬檸檬  0.5個（自己醃，1份鹽對3份水)
蒜頭          1粒 
黑椒          1 茶匙
薑　          1 茶匙
黃薑粉      1.5 茶匙
肉桂粉      1 茶匙
羊肉          500g

南瓜          200g
薑              2 片
洋蔥          1 個
芫荽          1 湯匙
香芹          1 湯匙
杏桃乾      50g (apricot)
提子乾      20g
番茄　      1 罐 (400g)
羊湯          300ml
蜜糖          0.5 湯匙

做法 Method: 
1. 檸檬肉取出切碎，皮留起待用。蒜頭切碎。
2. 將所有香料，檸檬，蒜頭放大碗內，再加入橄欖油拌勻。
3. 羊肉切塊， 放入步驟2 醃料醃至入味。過夜更佳。
4. 用油起鑊， 下薑及洋蔥爆香。 加入香草， 生果乾，然後再加醃好的羊肉。
5. 倒入南瓜，番茄及羊湯。 轉細火煮45 分鐘後加入蜜糖即成。

煙三文魚。炒蛋。薯餅 | Salmon and Scrambled Egg on Potato Cake

就快到情人節了。我個人認為， 呢個食譜絕對係可以用黎impress男朋友／老公。一來容易整， 二來個樣又靚， 三來一碟過無咩汁可以breakfast in bed ,  兼容易洗碟。如果你想再懶啲， 可以切靚塊多士代替薯仔餅。 諗諗下，其實... 都係將個平常嘅早餐放靚啲甘...
三文魚子係我俄羅斯嘅朋友由家鄉帶比我嘅。好味到哩...多謝晒Anna！
* 食譜參考- Jamie Oliver 

材料 Ingredients （2人份）： 
薯仔               250g (粉質薯仔較佳，例如maris piper)
麵粉               50 g 
蔥仔,切碎      適量 
牛油               1湯匙 
發粉               1／4 茶匙 
蛋                   2大隻 
煙三文魚       100g 

三文魚子       裝飾用 
檸檬               裝飾用 


做法 Method:
1 先將薯仔切塊， 煲內置鹽水將薯仔煮諗。瀝乾待涼
2 加入麵粉,發粉及蔥仔， 將薯仔壓爛及拌勻。
3 用手將薯仔混合物分為兩份， 整成球狀然後壓平 （大約2cm厚）
4 鑊中落油， 將薯仔餅兩面煎至金黃色。（中細火， 慢慢煎熟啊）
5 將蛋打散及加入鹽，牛奶。鑊中加牛油，炒蛋。
6 薯仔餅放底，上面放蛋，然後放三文魚。 灑上魚子， 香草。 檸檬伴碟， 即成。 



貼士 Tips：
1. 個人應為打蛋唔好打太耐， 另外炒時唔好係甘撥。 甘樣炒出黎隻蛋嘅口感就會有啲地方實啲， 有啲滑啲。 
2. Jamie都話蛋未熟曬就可以起碟，因為蛋內貯存左嘅熱能仲會煮多隻蛋自己一陣咖。 我另外加左煙肉 （因為雪櫃有淨）。做法簡單 - 慢火煎然後將油印走。

鹿肉配莓果醬汁 | Venison Steak in Berry Jus

喜歡食牛扒嘅人， 都應該會喜歡鹿肉吧？ 鹿肉肉味重肉質軟腍, 而且脂肪低， 係一個不錯嘅選擇。
同牛扒一樣， 要鎖住肉汁最好用大火快煎， 並且要靜置好先切開。呢個配薯蓉就最啱啦!




材料 Ingredients: 

紅果醬啫喱      2 湯匙 (redcurrant jelly)
牛湯                  80 ml
紅酒                  50 ml
黑莓                  30 g
牛油                  1 湯匙
鹿扒                  2 塊




做法 Method: 

1. 首先做鹿扒 - 用一個平底鍋煮溶牛油, 大火煎香鹿扒, 每面煎大約3-4分鐘
2. 如果壓下去有彈性就係medium, 本人認為最好味 煎完上碟靜置。
3. 然後做醬汁 - 先用細火將紅果醬啫喱煮溶。再加入高湯, 酒, 將果醬稀釋, 中火滾3分鐘直到濃縮再
4. 再加入黑莓, 鹽, 胡椒，轉細火滾5分鐘，直到黑莓變軟。
5. 熄火, 加入牛油 煮溶即成

南瓜蘋果湯 | Pumpkin and Apple Soup

好緊張， 終於寫第一個entry...! 諗左一排寫邊個食譜先好, 最後決定既然第一篇網誌, 就搵反個頭盤開場啦 :P 為大家介紹 南瓜蘋果湯 - 我本身唔係西湯嘅fans, 不嬲覺得中湯正好多, 但講到呢個南瓜湯就唔同啦... 湯好creamy, 好香口, 而南瓜本身都幾漏， 所以加左蘋果酸酸甜甜甘飲多幾碗都OK。注意呢個食譜要用攪拌機啊。

材料 Ingredients: 

南瓜          1 個 (約650g) *我用個隻係Butternut Squash 
西芹          1 條 
蘋果          2 小個
洋蔥          1 小個 
蒜頭          3 粒 
芫茜籽      1/2 湯匙 (coriander seeds) 
豆蔻          1茶匙 (nutmeg) 
雞湯          600 ml 
奶油          80 ml (single cream)


做法 Method: 

1. 焗爐預熱180度,  西芹, 洋蔥, 及南瓜切塊, 蒜頭連皮拍扁。
2. 將以上材料放焗盤上,  灑上芫茜籽, 豆蔻, 油及鹽拌勻,  焗至軟身, 約40分鐘
3. 焗好後將材料分次加入攪拌機內， 慢慢加入雞湯一拼打爛。
4. 打成蓉後， 放煲內煮滾，轉慢火加入奶油, 如果太杰可以加多小小雞湯。

Day 1 - 持之以恆.

幾年前寫過一個blog 係關於煮野食嘅。 當時落足心機 每星期都會打一篇食譜，仲有step by step 圖解。但耐何我當時要搬反去英國. 好忙無時間就放低左個blog, 之後一直就無再'執反起'。

記得個日睇電視， 某某廚師(好似係Ramsay) 話如果你真係鐘意煮野食， 每當你見到新鮮/ 特別嘅材料時會不其然咁好開心， 好興奮。個下我特然醒過來 - 佢講得太貼切啦, 我就係佢講嘅呢種人! 雖然唔係煮得特別好 但我真係好熱愛煮野食（同食野)。 所以  我今次決定重新寫過我個blog - 無人睇都好,  就寫比自己睇。因為我驚我第日老人癡呆左之後會唔記得自己曾經煮過咁多野... 有日會後悔哩。